Dvāviṃśatitamaḥ
Technical Details
22
198. tasmā hu mānu nihanitvana paṇḍitena
guruāśayena varabodhi gaveṣamāṇaḥ|
vaidyo va ātura svarogacikitsanārthaṃ
kalyāṇamitra bhajitavya atandritena||1||
199. buddhā ya bodhivaraprasthita bodhisattvā
kalyāṇamitra imi pāramitā nidiṣṭāḥ|
te cānuśāsaka iyaṃ pratipattibhūmī
duvi kāraṇena anubudhyati buddhabodhim||2||
200. atikrāntanāgata jinā sthita ye diśāsu
sarveṣu mārgu ayu pāramitā ananyo|
obhāsa ulka varabodhayi prasthitānā-
māloka śāstri imi pāramitā pradiṣṭāḥ||3||
201. yatha prajñapāramita śūnyata lakṣaṇena
tathalakṣaṇā ya imi jānati sarvadharmān|
śūnyānalakṣaṇa prajānayamāna dharmān
evaṃ carantu caratī sugatāna prajñām||4||
202. āhārakāma parikalpayamāna sattvāḥ
saṃsāri yuktamanasaḥ sada saṃsmaranti|
ahu mahya dharma ubhi eti abhūta śūnyā
ākāśagaṇṭhi ayu ātmana baddha bāle||5||
203. yatha śaṅkitena viṣasaṃjñata abhyupaiti
no cāsya koṣṭhagatu so viṣu pātyate ca|
emeva bālupagato ahu mahya eṣo
ahasaṃjñi jāyi mriyate ca sadā abhūto||6||
204. yatha udgraho tatha prakāśitu saṃkileśo
vyodāna ukta ahu mahya anopalabdhi|
na hi atra kaści yo kliśyati śudhyate vā
prajñāya pāramita budhyati bodhisattve||7||
205. yāvanta sattva nikhile iha jambudvipe
te sarvi bodhivaracitta upādayitvā|
dānaṃ daditva bahuvarṣasahasrakoṭīḥ
sarvaṃ ca nāmayi jagārthanidāna bodhau||8||
206. yaścaiava prajñavarapāramitābhiyukto
divasaṃ pi antamaśa ekanuvartayeyā|
kalapuṇya so na bhavatī iha dānaskandho
tadatandritena sada osaritavya prajñā||9||
207. caramāṇu prajñavarapāramitāya yogī
mahatīṃ janeti karuṇāṃ na ca sattvasaṃjñā|
tada bhonti sarvajagatī vidu dakṣiṇīyā
satataṃ amoghu paribhuñjati rāṣṭrapiṇḍam||10||
208. cirabuddhadevamanujān triapāyi sattvān
parimocituṃ ya iha icchati bodhisattvo|
pṛthumārgu tīru upadarśayi sattvadhātau
prajñāya pāramita yukta divā ca rātrau||11||
209. puruṣo ya agru ratanasya alabdhapūrvo
aparasmi kāli puna labdhva bhaveya tuṣṭo|
sa ha labdhva nāśayi puno'pi pramādabhūto
nāśitva duḥkhi satataṃ ratanābhikāṅkṣī||12||
210. emeva bodhivaraprasthita ratnatulyo
prajñāya pāramita yogu na riñcitavyo|
ratanaṃ va labdhva gṛhamāṇu abhinnasattvo
anubuddhayati tvarito śivamabhyupaiti||13||
bhagavatyāṃ ratnaguṇasaṃcayagāthāyāṃ kalyāṇamitraparivarto nāma dvāviṃśatitamaḥ||